Գիտագործնական քննարկման ընթացքում մասնակից պետությունների նոտարներն անդրադարձել են նոտարական պրակտիկայում «Քաղաքացիական, ընտանեկան և քրեական գործերով իրավական օգնության և իրավական հարաբերությունների մասին» Քիշնևի կոնվենցիայի և միջազգային այլ պայմանագրերի դրույթների կիրառման ընթացքում դրսևորվող արդի խնդիրներին։ ՀՀ նոտարական պալատի անդամ Նոննա Քամալյանը զեկույցով ներկայացրել է Հայաստանի նոտարների կողմից միջազգային ժառանգական գործերի վարման ընթացակարգերը, աշխատանքային պրակտիկայում հանդիպող խնդիրներն ու առաջարկներ՝ ուղղված դրանց լուծմանը։ Նոննա Քամալյանն անդրադարձել է միջազգային ժառանգական գործերի վարման առանձնահատկություններին, օրինակ, թե ինչ ընթացակարգեր են գործում, երբ ժառանգական գույքը գտնվում է ՀՀ սահմաններից դուրս, կամ երբ ժառանգատուի բնակության վերջին վայրը ՀՀ սահմաններից դուրս է, ինչպես նաև երբ օտարերկրյա քաղաքացի հանդիսացող ժառանգատուի բնակության վերջին վայրը եղել է Հայաստանում։ Նոննա Քամալյանն իր միջազգային գործընկերներին առաջարկել է ավելի արդյունավետ համագործակցել միջազգային ժառանգական գործերի վարման ընթացքում՝ ԱՊՀ պետությունների քաղաքացիների իրավունքների պաշտպանության նպատակով, որպեսզի միջազգային տարր պարունակող ժառանգական բարդ գործերը հնարավորության սահմաններում ստանան արագ լուծում։